أحمد طلعت*
عم جابر سرق وردتين من عنيها
وسرح ف دفتر المشاريب
طفّي أنوار المكان وولع شمع
ومزيكا منسية
بيحب الجو يكون رومانتيكي
عم جابر ...بيحب حبّيبة زمان
وبياعة الفل العجوزة اللي بتبيع أي ورد علي إنه فل
عم جابرواقف ف وسط الصالة بيغني
لعبد الوهاب ولفايزة أحمد
وبيحب محمد منير
"علموني عنيكي أسافر"
"علموني أفضل مهاجر"
ماخدش باله
إن شارع فؤاد غرقان ف المطر
مايهموش ف حاجة
المهم هو المكان
"علموني ولفوا بيا دنيا غير الدنيا ديا
طعم تاني وحاجة تانية"
"دا نتي نبع الحب صافي"...
طيب انت يا عم جابر
بابتسامة رايقة ومزاج يمكن يكون مش رايق
بتعرف تحط ابتسامتك جنب القهوة ع الترابيزة
عم جابر..بيسألني عنها وهو بيبتسم بحنية
ويردّ بابتسامة ساكتة
ويشطح خيال الشاعر المستخبي
يرسم تمثال السلسلة ف المكان
ينحته من جديد
ويشكل الزوايا والمنحنيات البسيطة
يشيل عيون الحجر ويحط عيون تانية مليانة بالحياة
عم جابرواقف معايا بيتفرج ع الخيال
وهو بينحت التمثال
شوية ويرجع لوسط الصالة
ف وقفته المعهودة
بهدوء وثقة
يمرر عنيه ع الموجودين
ويدندن اغنية لمحمد منير
"مش هاممني الكون هادي ولا زحمة الكون ..عادي
المهم انك تتراضي الحياة جنة بتشريفك"
يسرح ف دفتر المشاريب
عم جابر..ماخدش باله ان شارع فؤاد
برة زحمة
.برة..زحمة
يسألني
أطلع ع البحر منين؟
- البحر مش من هنا "-
البحر من فوق ..م السما
شايلاه الملايكة وهاترميه هناك
بعيد
جنب محطة قطر سيدي بشر
...سٍكتّْ.
..أطلع ع البحر منين ياعم؟
أنا اللي سمعي تقيل ولا انت اللي مش عارف؟
أنا اللي عنيا هربت للسما ولا انت اللي اتعميت؟
أنا اللي سرحان ف دفتر المشاريب
ولا انت اللي لسه غرقان ف مطر شارع فؤاد؟
ف زحمته؟
ف مزيكة الموالد والكلاسيك والجاز؟
ف كلام عيون
ورعشة شفايف
بتعشق تفاصيل تفاصيلها؟
ف قعدة ف ديليس وانت متأنتك؟
ف القهاوي البلدي العجيبة؟
أنا اللي باحلم ببرفان روحها
ولا انت اللي مافرشتش شوارع اسكندرية
بالورد البلدي؟
..عم جابرنقّي ترابيزة مش مشغولة
وقف عليها ورقص
غمض عنيه وانجلي
متشيك ومتكلين ورايق
رمي الدفتر والمشاريب وسماعة ودانه
والجاكت النبيتي
وفرد دراعه وعمل فيها نجم سينما
بيحب الجو يبقي رومانتيكي ...عم جابر
بيدندن بأغنية لمنير" مهما بلاد الدنيا تنكرني
والكل ينكرني
ضحتك بتندهني
نظرتك بتعرفني"
...طيب أنت ياعم جابر
بس مش قد وسط البلد
رحلات وسط البلد
وعراكات وسط البلد
مغامرات شهر مارس
بتحب الخريف؟ -
بس بحب المطر أكتر -
والدفا المخصوص
والفراولة الطايبة
عم جابر
كل اما تسألني عنها
مش هارد
غير بابتسامة ساكتة
ـــــــــــــــــــــــــــــــــــــــــــ
شاعر و قاص إسكندرانى
على فكرة انا مش طايقك
ردحذف